ایسا ہے کہ سب خواب مسلسل نہیں ہوتے

ایسا ہے کہ سب خواب مسلسل نہیں ہوتے 

جو آج تو ہوتے ہیں مگر کل نہیں ہوتے

اندر کی فضاوں کے کرشمے بھی عجب ہیں 

مینہ ٹوٹ کے برسے بھی تو بادل نہیں ہوتے 

کچھ مشکلیں ایسی ہیں کہ آساں نہیں ہوتیں 

کچھ ایسے معمے ہیں کبھی حل نہیں ہوتے 

شائستگی غم کے سبب آنکھوں کے صحرا 

نمناک تو ہو جاتے ہیں جل تھل نہیں ہوتے 

کیسے ہی تلاطم ہوں مگر قلزم جاں میں 

کچھ یاد جزیرے ہیں کہ اوجھل نہیں ہوتے 

عشاق کے مانند کئی اہل ہوس بھی 

پاگل تو نظر آتے ہیں پاگل نہیں ہوتے 

سب خواہشیں پوری ہوں فراز ایسا بھی نہیں ہے 

جیسے کئی اشعار مکمل نہیں ہوتے 

احمدفراز

˙·٠•●♥ H(♥♥ مھجے تم یاد آتے ہو ♥♥)G♥●•